ANGELES CITY — Sa halip na karaniwang magarbong opening salvo, pinili ng Team Puso sa pangunguna ni Mayoral candidate Rep. Jon Lazatin na simulan ang kanilang kampanya sa isang taimtim na misa sa Carmelite Monastery noong Biyernes, Marso 28. Ipinakita ng grupo na higit sa ingay at kasiyahan, mas pinahahalagahan nila ang panalangin at katahimikan bilang gabay sa kanilang laban sa halalan.
Ayon kay Lazatin, hindi umano nagsisimula ang pangangampanya sa araw ng opening salvo kundi sa mismong unang araw ng kanyang panunungkulan bilang lingkod-bayan. “Ang tunay na serbisyo ay hindi kailangang ipagsigawan. Mas nararamdaman ito sa mga gawa kaysa sa salita,” ani Lazatin sa isang panayam matapos ang misa.
Sa kanilang panalangin, inalay ng Team Puso ang kampanya para sa isang maayos, mapayapa, at makabuluhang halalan. Tinutukan din nila ang paghingi ng gabay at proteksyon hindi lamang para sa kanilang mga kandidato, kundi para sa lahat ng Angeleño na haharap sa darating na halalan.
Bumida sa simpleng seremonya ang katahimikan at pagninilay, isang malinaw na paglilihis sa karaniwang makukulay at maiingay na pagsisimula ng kampanya. Hindi rin ipinakita ni Lazatin ang anumang presentasyon ng plataporma o parade ng mga tagasuporta. Ayon sa kanya, sapat na ang kanyang track record at ang tiwala ng taongbayan sa pangalan ng kanilang pamilya.
“Kilala na kami hindi sa dami ng sinasabi kundi sa bigat ng aming nagagawa,” dagdag pa ni Lazatin. Binanggit niya ang kasaysayan ng pamilya Lazatin sa serbisyo publiko at ang prinsipyo nilang “ditak a salita” o kakaunti ang salita, na siya umanong naging sandigan ng kanilang pamumuno.
Ang Team Puso ay binubuo ng mga incumbent at bagong mukha sa politika na pawang tumatakbo sa ilalim ng platapormang nakatuon sa serbisyo, integridad, at tunay na malasakit sa mamamayan. Bagamat tahimik ang kanilang simula, nagbigay sila ng katiyakan na magiging masigla ang kanilang kampanya sa mga susunod na araw, ngunit nananatiling nakatuon sa layunin at hindi sa palabas.
Sa kabuuan, ipinakita ng Team Puso ang alternatibong paraan ng pangangampanya—isang simula na puno ng panalangin at pasasalamat, na tila panata nila sa mga Angeleño para sa isang mas maayos na pamumuno.
Source: CLTV36 News
